Muxtar respublikanın mövcud idman infrastrukturu bir çox idman növünün inkişafı üçün əsaslı baza rolunu oynayır. Bununla yanaşı, son dövrlər özəl klubların fəaliyyətini təkmilləşdirməsi, idmanda sahibkarlığın dəstəklənməsi nəticəsində yeni idman zalları açılır və ya əsaslı təmir olunaraq istifadəyə verilir. Belə məkanlardan biri də Naxçıvan şəhəri A.Zamanov küçəsində “Levent Bulut Fight Club-Naxçıvan” Döyüş Klubuna aid idman zalıdır.

Naxçıvan Muxtar Respublikasının gənclər və idman naziri səlahiyyətlərini müvəqqəti icra edən, nazir müavini Məcid Seyidov klubun məşq proseslərindən birini izləyib, idmançılar üçün yaradılan şəraitlə tanış olub. Nazir müavini idmançıların qayğıları və gələcək yarışlara hazırlıq səviyyəsi ilə maraqlanıb, onlara olan güvənini ifadə edib. Əlavə olunub ki, son dövrlər qarışıq döyüş idman növlərində təmsilçilərimizin qazandığı nailiyyətlər nəticələrin artım tempini yüksəltməklə yanaşı, idmançıların gələcək karyerası baxımından böyük ümidlər vəd edir.

Klubun təsisçisi və məşqçisi, eyni zamanda Naxçıvan Kikboksinq Federasiyasının baş məşqçisi olan Etibar Qəribov fəaliyyətləri haqqında məlumat verərək deyib ki, 2019-cu ildən bəri burada məşqlərə start verilib. Hazırda 2 məşqçi və 1 köməkçi məşqçinin rəhbərliyində uşaq, yeniyetmə və gənclərə qrup, böyüklərə fərdi olmaqla kikboksinq, muay tay, uşu və boks məşqləri keçirilir. Klub idmançılarının nailiyyətlərindən danışan məşqçi İnci Allahverdiyeva, Qənbər Nağıyev, Aysu Həşimova, Cəsur Kətənov kimi istedadlı tələbələrinin Azərbaycan birincilikləri və ölkə xaricindəki nüfuzlu yarışlarda, döyüş gecələrində qazanılan uğurları barədə məlumat verib. Əlavə edilib ki, İnci Allahverdiyeva və Tayfur Əliyev bu ilin may ayında Türkiyənin İstanbul şəhərində keçiriləcək WAKO Dünya Kubokunda iştirak edəcəklər.

Sonda Etibar Qəribov Məcid Seyidova öz təşəkkürünü bildirib, klubu adından nazir müavininə xatirə plaketi təqdim edib.  

Naxçıvan Muxtar Respublikası Gənclər və İdman Nazirliyinin mətbuat xidməti